Në kuadër të trajnimeve për administrimin e zgjedhjeve për Kuvendin e Shqipërisë, sot filloi trajnimi me drejtuesit qendrorë dhe vendorë të Policisë së Shtetit.
Trajnimi nisi në prani të Komisionerit Shtetëror të Zgjedhjeve Ilirjan Celibashi, të ambasadorit të OSBE-së, Michel Tarran, zëvendësprokurorit të përgjithshëm Thoma Jano dhe Prokurorit të SPAK-ut Klodjan Braho dhe hapjen e punimeve e përshëndeti Drejtori i Përgjithshëm i Policisë së Shtetit, Ilir Proda.
Ky cikël trajnimesh do të vazhdojë për punonjësit e Policisë në të gjitha nivelet, të cilët do të jenë të angazhuar me detyra gjatë procesit zgjedhor, në zbatim të Kodit Zgjedhor.
Rreth 140 oficerë policie të nivelit të lartë dhe të mesëm, përfshirë zëvendësdrejtorin e Përgjithshëm, drejtorët e departamenteve, drejtorët e policisë rajonale dhe të kufirit, si edhe shefat e komisariateve dhe zëvendësdrejtorët rajonalë, do t’i nënshtrohen trajnimit nga data 24 deri më 26 shkurt. Më pas, nga 3 deri më 7 mars, do të trajnohen rreth 160 trajnerë, të cilët do të fillojnë trajnimin zinxhir për rreth 6 000 punonjës policie.
