Sot, në Komisionin Qendror të Zgjedhjeve u zhvillua një takim të hapur dhe konstruktiv me përfaqësues të shoqërisë civile, ku u diskutua gjerësisht mbi mënyrat dhe procedurat për denoncimin e shkeljeve zgjedhore, si në periudhën parazgjedhore, ashtu edhe gjatë ditës së votimit.

Gjatë takimit, Komisioneri Shtetëror i Zgjedhjeve, Ilirjan Celibashi theksoi rëndësinë e përmirësimit të cilësisë së denoncimeve, sidomos tani që jemi gjithnjë e më afër datës së zgjedhjeve, dhe pritet që numri i tyre të rritet. Për këtë arsye, tha ai, është thelbësore që çdo denoncim të jetë i qartë, i saktë dhe i mbështetur me prova konkrete. Vetëm denoncimet e strukturuara mirë, që përmbajnë informacion mbi “çfarë ka ndodhur”, “kush është i përfshirë” dhe “cilat janë provat”, mund të trajtohen në mënyrë efikase dhe të japin rezultat.

Deri tani, KQZ ka marrë 52 denoncime, një tregues i interesit dhe angazhimit të aktorëve të ndryshëm për integritetin e procesit zgjedhor. Për të garantuar një trajtim cilësor dhe brenda afateve ligjore, ne vlerësojmë si të domosdoshëm bashkëpunimin e ngushtë me shoqërinë civile dhe institucionet e tjera.

Në këtë kontekst, u diskutua edhe për mundësinë që KQZ të vendosë në dispozicion formate standarde për denoncimet, në mënyrë që çdo raportim të jetë sa më i plotë dhe i saktë. Një denoncim i strukturuar mirë jo vetëm që lehtëson punën tonë si institucion, por ndihmon edhe në parandalimin dhe ndëshkimin e shkeljeve.

Një element kyç që u nënvizua gjatë takimit ishte rëndësia e bashkëpunimit të ngushtë me SPAK dhe Prokurorinë e Përgjithshme, në kuadër të Protokollit të Koordinimit dhe Bashkëpunimit të nënshkruar së fundmi. Ky protokoll siguron që çdo denoncim me elementë penalë të trajtohet me prioritet maksimal dhe transparencë të plotë, duke forcuar kështu besimin e qytetarëve tek institucionet që garantojnë integritetin e zgjedhjeve.

KQZ mbetet e përkushtuar për një proces zgjedhor të pastër, të drejtë dhe transparent, ku zëri i qytetarëve dhe angazhimi i shoqërisë civile luajnë një rol kyç në garantimin e standardeve më të larta demokratike.