Sot, Komisioneri Shtetëror i Zgjedhjeve, z. Ilirjan Celibashi, bisedoi me përfaqësues të mediave mbi ecurinë e përgatitjes së procesit të zgjedhjeve për Kuvendin, të datës 11 maj 2025. 

KSHZ përcolli disa informacione me interes për opinionin publik: 

  Subjektet zgjedhore 

• 51 parti politike janë regjistruar si subjekte zgjedhore. 
• 2 parti politike janë në proces shqyrtimi të kërkesave për regjistrim si subjekte zgjedhore. 
• Sot, në orën 24:00, përfundon afati për dorëzimin e kërkesave për regjistrimin si koalicione zgjedhore. 
• Më 12 mars përfundon afati për dorëzimin e listave shumemërore të kandidatëve. 
• Brenda datës 20 mars shpresojmë të përfundojmë të gjithë procesin e shqyrtimit dhe miratimit të listave shumemërore, me shpresën që nuk do të kemi problematika me dokumentacionin. Kjo do të na mundësojë mjaftueshëm kohë për të përgatitur gjithë dokumentacionin zgjedhor për votimin nga jashtë. 

Votimi nga jashtë 

Ecuria e përgatitjes së procesit ka vijuar në përputhje me parashikimet ligjore. 

• Më datë 4 mars, ora 24:00, përfundon afati për paraqitjen e kërkesave për t’u regjistruar si zgjedhës nga jashtë. 
• Dita e diel, 2 mars 2025, ka qenë dita me numrin më të madh të aplikimeve për t’u regjistruar në listën e zgjedhësve nga jashtë, me 16,302 shtetas shqiptarë. 
• Deri më 9 mars do të shqyrtohen kërkesat që mbërrijnë sot dhe nesër. 
• Më 9 mars do të publikohet lista paraprake e zgjedhësve nga jashtë. 

Komisioneri iu përgjigj interesit të gazetarëve në lidhje me mundësinë e shtyrjes së afatit të regjistrimit të zgjedhësve nga jashtë. Ai theksoi se nuk është e mundur të shkohet përtej datës 9 mars, pasi kjo është një datë e përcaktuar nga Kodi Zgjedhor. 

Pa një proces amendimi ligjor, nuk mund të ketë shtyrje përtej kësaj date. 

Deri më 9 mars mund të diskutohet, pasi nga ana teknike KQZ është e gatshme, por mungon konsensusi politik për një shtyrje të mundshme. 

Komisioneri bëri me dije se i ka propozuar dy forcave kryesore politike që, të paktën për 42 mijë zgjedhësit të cilëve u është refuzuar kërkesa, të konsiderohet mundësia që KQZ të ketë disa ditë shtesë për të asistuar në një proces riaplikimi. 

Nëse KQZ arrin t’i trajtojë këto raste individualisht, sikurse po bën aktualisht, kjo do të ishte me dobi. Megjithatë, edhe kjo mundësi duhet të adresohet nga Komisioni Rregullator përmes një akti normativ përkatës. 

Aktualisht, data 4 mars mbetet afati i fundit për aplikimin për regjistrim në listën e votuesve nga jashtë. 

Shërbimi postar 

KQZ sqaroi se po punon për termat e referencës për garën që do të zhvillohet për përzgjedhjen e operatorit postar. Nuk ka vend për diskutime mbi raste hipotetike, por do të mbahen parasysh dy parime bazë: 

1. Siguria që fleta e votimit të mbërrijë sa më shpejt dhe personalisht në dorën e çdo zgjedhësi të regjistruar. 
2. Marrja e këtij shërbimi me koston më të ulët të mundshme, pa cenuar standardin e mësipërm. 

Në respekt të ligjit, do të ftohen të gjithë operatorët ndërkombëtarë të shërbimit postar që kanë përfaqësues në Shqipëri. 

Votimi elektronik 

Komisioneri Celibashi konfirmoi se votimi elektronik do të vijojë të mbetet një projekt pilot dhe do të zbatohet në: 

• Njësinë Administrative nr. 10 në Bashkinë Tiranë. 
• Bashkinë Vorë.